曼谷印象——迷失勒新旧交错中个天使之城原创邵天骏海上梦叠
作者：邵天骏
沪语改写：冯济民
诵读：周恋云
文字修正：丁迪蒙
编辑：王乙其
刚刚到曼谷个辰光，我还觉着是勒国内个某个大城市。伊个现代化大厦搭外观邪气普通个民居混杂，有一种时光倒流个梦幻。以我个人个感觉，曼谷身为泰国首都，勒东南亚一带也算是发展比较好个大都市，应该是邪气勿一般个伐。但是当我一来到搿搭，再发现多少有点出乎意料。后来再晓得，曼谷个新旧反差之大，自有伊特殊个原因。
勒泰国，个人个财产神圣勿可侵犯。侬个土地，侬个房子，勿经侬个同意，任何人是无权拿侬赶脱，或者拿伊强行拆迁个。迭能一来，曼谷个城市风景就有了彩色搭黑白映衬，现代搭落后相间，大家相安无事。尽管看起来留有一眼遗憾。
其实，曼谷还是蛮繁华个，甚至是邪气繁华。有辰光看起来简直是令人眼花缭乱。马路旁边个各式豪华酒店、大型公寓、高档购物中心娱乐设施鳞次栉比，应有尽有。而各种保存完好个古老建筑也是时勿时可见。迭搭个地域特征总归是搭昭披耶河有千丝万缕个联系。呒没迭条河流蜿蜒经过，孕育大地个生命，可能就呒没曼谷今朝个踪影。
就是由于曼谷个风韵来自新旧对比、古今相间，高档搭平淡并存个格局、也就成了一种岁月个经典。保存完好个城市风貌铸就了伊个内在和谐性格，勿经意间就穿透到了古老个年代里，让交关来此地游览个各国游客乐此勿疲。慢慢叫，我就感受到了迭座城市个巨大活力，激情四射而又勿乏温柔典雅。伊个城市魅力勿仅有美轮美奂个大王宫搭金碧辉煌个寺庙，还有交交关关颇具特色个民居。伊拉构成了一幅城市个曼妙景象，使撩人心魄个曼谷成为了全球闻名个大都市。
勒曼谷白相，侬会发现一个有趣现象，中国游客之多，已经成为迭搭旅游业个支柱。所以，泰国政府老注重国内政局搭治安稳定，长怕因为安全问题，使得国外游客、尤其是中国游客大量减少，对泰国旅游业带来重创。我看到勒交关景点，差勿多侪是中国游客个天下，中文导游数量因此常庄缺乏。一眼大学中文专业学生或者汉语流利个华裔变得吃香起来。阿拉个导游阿娇小姐就是个年轻漂亮个华人，一口纯正个普通话让人眼热。伊15岁就随屋里人来搿搭并且入籍，已经有得8年了。
走勒曼谷马路浪，沿街个电线杆浪常庄有一圈圈黑颜色个电线挂勒海。迭眼比较凌乱个电线看起来搭城市个景观勿大符合，让我想起上世纪八九十年代上海个勿少地方也是迭能处理个。于是，我好像闻到了上海久违个城市气息，当时个上海城市面貌搭现在个曼谷景象几化像啊。
曼谷个夜市邪气闹猛，大型亮丽个广告牌勒各式灯光个闪烁下熠熠生辉。而价廉物美个商品也是琳琅满目。假使侬有心去淘，是可以满足自家个各种心愿个。相对于日里，夜里向蛮风凉个，交关人索性坐勒马路边浪吃茶聊天，看起来别有一番风情。
曼谷个夜市
曼谷个生活节奏属于世界浪最从容、最惬意个地方之一。每趟外出欣赏曼谷个美丽，侬个心好像已经安顿勒迭搭，勿再有紧张感觉，勿会有工作勒后头催侬。于是，无忧无虑、尽情享受成为了随处可见个快乐之源。走进迭座城市，融入勒伊个诗情画意里，我个脚步也变得愈加轻盈了。
作者：邵天骏
诵读者：周恋云
——————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《曼谷印象——迷失勒新旧交错中个天使之城》